"صحيت متأخر ولبست عشان أخرج للجنينة دخلت دادة راوية سندتني وساعدتني زي كل يوم وإتفاجئت بشكل المكان اللي بقعد فيه وإزاي متنظم وريحته حلوة مش عارف أوصلها وفطار مترتب ومحطوط"..
_هو الفطار جاهز يادادة؟
_ايوه يابني جهزتهولك وحورية جات وضبت المكان هنا وظبته علي الأخر..
_حورية دي هتبهت علينا كلنا بمصطلحتها.. إيه وضبت دي يادادة متقعديش معاها كتير..
_إنت عارف إني بحبك زي ولادي صح.. دي بنت باين عليها غلبانة يا أدم وكمان مرتبالك المكان هنا وحطالك بخور ريحته حلوة أوي.. مش شامه؟!
_شامم اه بس مكنتش اعرف دي ريحة إيه؟
°ده بخور هندي سااايب مش بمشي منغير بخور أصلي بحب أشغله دايما حواليا..
_بسم الله الرحمن الرحيم إنتي جيتي من إمتي؟؟
°من دلوقتي.. حد ميعرفش ريحة البخور؟
_أنا.. عندك مانع؟!
°يلا اديني عرفتهولك..
_والنبي يادادة تبقي تعلميها تقصر لسانها ده أحسن هقصهولها..
" ضحكت "..
_دي حورية طيبة يا أدم.. هي صحيح لمضة بس طيبة وبتشتغل كويس احسن من اللي جيهم قبلها، مع إنها بتقول أنها أول مرة تشتغل..
"هي فعلا باين عليها إنها صغيرة ومش وش بهدلة"..
_اه منا أصلي عرفت قيمتك إمبارح يادادة بقول للهانم تعملي عشاء جابتلي شعرية..
_كدا!! كسفتينا الهي يكسفك..
°مش حضرتك ياطنط قولتيلي إني مليش دعوة بالمطبخ وبعدين الاستاذ اللي جابني هنا قالي إني هبقي مع مستر ادم بس..
_هو مستر أدم ده مبياكولش..!
" فضحتني يخربيتك إيه ده فضيحة"..
_أعملي حساب كريم علي الغداء يادادة..
_من عنيا ده بقاله كام يوم مبيجيش..
_فعلاً..
"أنا هفضل واقفة زي الاطرش في الزفة كدا ومش فاهمة بيتكلموا عن مين؟"
"مشيت دادة راوية للمطبخ وأنا فضلت لكن فضولي قاتلني أعرف مين اللي جاي.. شكله حد بيحبه لأنه مبسوط.."
_إنتي حاطة ورد هنا؟
° اه ريحته عاملة جو حلو في الصبح كدا صح..
"هو ساكت ليه؟"..
°قول صح، ساكت ليه.. لاتكون مبتحبش الورد..!
_دي جملة صح..
°مفيش حد مبيحبش الورد..
" إنت عصبي ومعقد ولا إيه؟ "..
°أصل الورد ده حاجه جميلة يعني لا مثلا أكل طعمه وحش ف مش هتحبه.. ولا حيوان مؤذي هنخاف منه.. يبقي منحبوش ليه؟!
_إنتي بتدرسي إيه؟ فلسفة..؟
'ضحكت'
°لا أختها.. علم نفس..
_أنا قولت بردو التفكير ده تفكير مجانين..
" كشرت وهي بتقول"..
°يعني أنا مجنونه؟
_بتتكلمي كتير.. هاتيلي العلاج لو سمحت..
°حاضر..
"وفعلا جبتله علاجه وشرب العصير وفضلت واقفة مستنياه يطلب أي حاجة"..
_روحي ساعدي دادة راوية في الغداء عشان كريم قرب يوصل..
°ممكن أسالك سؤال؟
_إتفضلي..
°مين كريم؟
_هتفرق معاكي في ايه؟! على العموم كريم ده الدكتور بتاعي وصديقي..
°شكله حد بتحبه لأنك مبسوط إنه جاي، علي غير العادة مبتكونش مبسوط لما حد يجي..
" غريب إنها تاخد بالها.. "..
_منا بقولك إنه صديقي..
°هروح أساعد طنط راوية..
_طنط دي تقوليها لما تبقي خالتك.. اسمها دادة راوية..
" ياااثقيييل"..
°إيه المشكلة مش فاهمه.. طيب ماهي بتقولك يا أدم مع إنك صاحب الشغل..
_ايوه وبعدين يعني؟
°وبعدين ايه؟
_عاوزة إيه؟
°يعني قصدي إني مش بغلط فيها وبعدين أنا مش واخدة علي كلمة دادة أصلا..
"ضحكت بدون قصد وقالت"
عندنا دادة دي بيقولوها اطفال الحضانه مش الكبار..
"لكن واضح إنه متقبلش طريقة هزارها أبدا.."..
_مش إنتي اللي هتعلميني أتكلم إزاي.. عندكوا ده اللي هو فين في الحارة؟! إتفضلي روحي شوفي شغلك..
" فضلت واقفة تبصلي ثواني بزعل وإستغراب ومشيت من غير كلام لكن الأكيد إنها زعلت..وأنا بصراحه كنت قاصد.. محبتش إني أخد عليها ولا هي كمان خصوصا أنها شخصية إجتماعية زيادة ومبتحطش حدود وانا لحد دلوقتي مش عارف إذا كانت خارج دايرة الشك ولا لا"..
___________________
في المطبخ:
_ مالك بوزك شبرين كدا.. ولا تكونيش زعلانه عشان أدم فضح الشعرية بتاعتك..
........
_ مالك ياحورية يابنتي في إيه؟..
° هو عيب إن الواحد يكون مستواه متوسط ياطنط.. يعني فيها إيه لما أكون عايشة في عزبة ولا حارة وأبقي بتعامل عادي مع اللي زي أدم بتوع التجمع والأماكن الواو.. هو الإجتماعية وحشة.. هو ليه متكبر كدا؟
_ إهدي ياحبيبتي إنتي فهماه غلط.. أدم مش متكبر أبدا لكن اللي حصله خلاه واخد جمب من أي حد ميعرفوش..هو أصلا مش مأمن للي يعرفهم هيأمن لناس ميعرفهومش إزاي بس؟! وبعدين حالة العجز اللي هو فيها دي _حتي لو كانت مؤقته_ فهي بردو مأثرة فيه..
________________
كلام منطقي ومش منطقي لكن جوايا تساؤلات كتير مش عارفه ألاقيلها إجابة.. صاحبه جيه وفضل قاعد معاه كتير وكنت شيفاه من بعيد مبسوط معاه لكن محبتش أروح ناحيتهم.. يمكن قلقت يكلمني بطريقة متكبرة تاني قدام صاحبه ده.
____________________
اقرا ايضا: |شمس مصر|.. خُلقت لتكون حورية (الفصل الأول).
اقرا ايضا: |شمس مصر|.. حوار خاص من شمس مصر مع الكاتبة والروائية نجلاء يوسف
اقرا ايضا: |شمس مصر|.. أشعر بالسعادة اليوم
