تقارير وتحقيقات

|شمس مصر|.. شمس مصر في حوار خاص مع المهندس بيشوي مكرم

2022/02/14 12:07 AM | المشاهدات: 1502

ساره محمد

-في البداية أحب أرحب بحضرتك معانا في جريدة شمس مصر الإخبارية

•ميرسي جدًا الله يخليكي وشكري للجريدة طبعًا

-في البداية ممكن تعرفنا بحضرتك؟

•اسمي بيشوي مكرم من بني سويف وعملي مهندس ديكور وكاتب نشرت حوالي 5 كتب حتى الآن وجاري نشر كتب أخرى إن شاء الله.. غير التدوين على مواقع إلكترونية

-أهلًا وسهلًا بحضرتك

•أهلًا وسهلًا يا فندم

-بدأت كتابة من امتى؟

•كنشر كتب من حوالي سنتين لكن اقرأ واكتب منذ طفولتي، بدأت في البداية بالتدوين الإلكتروني وكان لدي صفحات على الفيسبوك وفي الفترة الأخيرة بدأت أضع كتب وأنشرها

-بدأت تنمي كتاباتك ازاي؟

•هو المعروف حضرتك إن أي حد بيقرأ كتير بيزداد مفردات لغوية وبيفهم أسلوب أنه يكتب فمن خلال قراءتي جه عليّ وقت حسيت إني لازم أمسك القلم والورقة واكتب

-مين أفضل كاتب بالنسبة لحضرتك؟

•أنا بحب الأدب المترجم أكتر من العربي خصوصًا بحب وليام شكسبير ومفيش حد بيحب الأدب إلا لازم يكون قرأ مسرحياته.. وتشارلز ديكنز في بعض أعماله وبعض أعمال جورج أورويل

-مين أكتر شخص كان داعم لحضرتك؟

•ناس كتير قابلتهم في حياتي اتعلمت منهم وساعدوا بإنهم يخلوني نسخة أفضل مني دي حقيقي يعني، والدتي طبعًا من أجمل الشخصيات اللي دعمتني ومازالت بتدعمني

•انا أحب أقدم كتبي ممكن؟

-أكيد

•فيه كتاب اسمه (ذهب طراودة) عن قصة العالم الألماني هنريش شليمان وأنا الكتاب ده قرأته في طفولتي وبحس دايمًا إني شبه الشخصية دي ونزلت ديوانين شعر بالفصحى.. أولهما ديوان (من وحي صديقتي الشمس) إصدار دار ماستر وده يجمع بين دفتيه كل أحلامي وأفكاري نسجتهم في شكل الشعر اللي قدمته والديوان التاني (سيرة السندباد العماني) بقدم قصة السندباد بطل ألف ليلة وليلة بس بأحداث من نسج خيالي تناسب قراء العصر الحالي وبعدين فيه رواية (السبيل إلى الحلم) إصدار الدار المصرية السودانية وهي رواية تنتمي لرواية واقعية بقدم قصة شباب بيحاولوا السفر لأوروبا واللي بيواجهوه من أجل أحلامهم وآخر كتاب صدر وأهم كتاب الحقيقي كتاب في علم الاجتماع ومحاولة لتقديم أطروحتي الخاصة عن يوتوبيا قابلة للتطبيق وكذا مشروع لتعمير صحراء مصر وشرح مفاهيم فلسفية وسياسية اسمه (مسودات عن التقدمية) إصدار منشورات الفنار وإن شاء الله هيتم نشر 3 كتب أخرى غير مشروع للترجمة بعمل عليه في معرض الإسكندرية القادم جاري التعاقد عليهم يعني وبس كده عشان تعبت حضرتك

-لا مفيش تعب ولا حاجة ربنا يوفق حضرتك دايمًا يارب

•ميرسي أنا حبيت ألخص محتوى الكتب

-جميل جدًا

-في خلال الفترة اللي حضرتك بدأت تكتب فيها وتنشر كتبك اتعرضت لكلام محبط من الناس اللي حواليك؟ ولو اتعرضت قدرت تتخطى الكلام ده ازاي؟

•آه ده بقى سؤال جميل جدًا، كتير كتير، أولًا الناس المحيطة ممكن يقولوا للكاتب في بدايته وايه فايدة إنك تكتب غير إن فيه حاليًا مع تزايد أعداد دور النشر بقى ناس كتير بتكتب وتنشر عشان مادام قادرين يدفعوا تكاليف النشر الدار مبترفضش مش كل دور النشر يعني اللي عايز أقوله إيماني بإن عندي حاجة عايز أوصلها للناس وإني مش هيفرق معايا الناس تعرف شخصي بعد أول كتاب ولا رابع كتاب المهم أظل انشر ده مخليني واثق وأنا بمضي عقد الكتاب.. وعايز استمر اكتب وانشر حتى يحين يومي إن شاء الله مش مهم الشهرة المهم الناس تقرأ واحتياج المكتبة العربية لنشر كتب أكتر احنا كمكتبة عربية مقارنة بالمكتبات في العالم الغربي بننشر كتب قليلة جدًا بالرغم من كثرة عددها.. بس برة النشر أكبر برضه ومحتاجين ننشر في كل المجالات العلمية ونقلل شوية من الروايات في المقابل كتب تخصصية أكتر يعني

-وده كويس

-هل حضرتك شاركت في معرض القاهرة الدولي للكتاب قبل كده؟

•أيوة يا فندم كل كتبي شاركت بالمعرض السنة دي والعام الماضي كمان وده شيء يفرحني طبعًا أنه من أكبر معارض الكتاب وأكثرها قيمة في العالم العربي على الأقل يارب أشارك كل عام بإذن الله كمان

-إن شاء الله

•ميرسي

-بتتمنى توصل لإيه في يوم من الأيام؟

•تصدقي ده سؤال صعب عايز أوصل للأهداف اللي في أحلامي

-إن شاء الله تحقق اللي حضرتك بتتمناه

•ميرسي إيانا وإياكم يارب

-كلمة حابب توجهها للكُتاب المبتدئين

•اقرأ كتير واكتب لكن متستعجلش وتكتب حاجة بعد كده تلاقيك مش راضي عليها في مشوارك بعدين يعني انشر الحاجة اللي تلاقيها فعلًا هتفيد الناس أو ليها قيمة ومتزعلش من نقد بعض أصحاب دور النشر مثلًا.. خليك مؤمن برسالتك

•عايز أقول حاجة كمان لو تسمحيلي يا أستاذة سارة

-أكيد

•فيه ناس كتير بتنشر لأن فيه واسطة ومحسوبية ولغة المال بتقول كلمتها وللأسف هما بيقدموا محتوى أدبي أو فكري ضعيف بس ميخليش المثقفين الحقيقيين.. أهل القلم الحقيقيين يحبطوا.. الثقة والاستمرارية والإيمان بس كده

-كلمة حابب توجهها لجريدة شمس مصر الإخبارية

•أشكرها جدًا وأشكر اهتمامها بكاتب في بداية طريقه مثلي.. وأشكر ذوق ومجهود أستاذة سارة في إجراء الحوار

-أنا اللي حابة أشكر حضرتك على الحوار ده متمنية لحضرتك دوام التوفيق والنجاح

•أشكرك ميرسي جدًا