من السهل إنّك تعرفي الراجل اللي قدامك بيفكر إزاي من خلال مُعَاشرتك له وكلامك معاه بس الأصعب إنّك تعرفي ترضيه وتعملي اللي يريحه
لأن الرجاله ليهم متطلبات كتير علي المستوي الشخصي أو الاجتماعي ولو الست قدرت تعمل كده هتبقي سوبر ومان .....
الراجل عايزك جدعه وحنينه وطيبه ورياضيه ومثقفه ومعاكي كذا لغة بس لسانك مش معوّج ،
تبقي شيك وجسمك حلو ورشيقة بس مش رفيعه
،تبقي قمة في الدلع والأنوثه بس تتكلمي معاهم عِدل،تعتمدي علي نفسك وطلباتك متبقاش كتير بس تحسسيه بمكانته وأهمية وجوده في حياتك ، تتعرفي علي اصحاب وتتكلمي معاهم بس متخرجيش كتير،
تبقي تفهه وفرفوشه وليكي في الهزار بس وقت ماحضرته يتكلم بجد المفروض تفهميه وتستوعبي كلامه، تبقي اجتماعيه وعارفه ناس كتير بس متتكلميش مع حد غيره تبقي نزيهه ومش حارمه نفسك من حاجه ومتبقيش بخيله بس متصرفيش كتير ،تحققي ذاتك وتعملي كارير لنفسك بس تعرفي تطبخي وتغسلي وتنشري وتحسسيه انك ولا حاجه جمبه ، تحبي ابوه وامه واخواته وتكلميهم كتير بس متدخليش بينه وبين عيلته ، تبقي دماغك كبيره وعَقله وهاديه بس قلبك يكون زي الاطفال، يزعلك ويقول كل الكلام ال مضايقه منك و أول ميجي يصلحك لازم تقوليلي حاضر انا مش زعلانه ولو عملتي العكس يبقي ازاي؟ ملكيش حق .
أغلبية الرجاله بيفكروا بالطريقة دي وربنا سبحانه وتعالي خلق الراجل بيفكر كده وانه لازم يكون مسيطر علي شريكة حياته بس لازم يبقي فيه حدود ويسيطر علي نفسه ويتمالك أعصابه لأن هي كمان لها قلب وبتحس ومش معني إنها بتسمع كلامك يبقي هي ضعيفه بالعكس هي كده بتحبك وبتخاف علي زعلك.
كل واحد له مميزاته وعيوبه فلازم كل إنسان يختار شريك حياته صح ويسأل نفسه ياتري هقدر أستحمله وقت زعله ؟ هقدر أعيش معاه في تقلابته المزاجيه ؟ هقدر أعيش معاه علي الحلوه والمره؟مش هيجي يوم وأندم علي إختياري !
لو هتقدري يبقي إنتي بتحبي الشخص ده بجد وهتقدري تستحمليه وهتاخدي قلبه وعقله ويفضل يحبك العمر كلو .
أحسنوا الأختيار يجماعة ومتستعجلوش عشان متندموش بعد كده
وصدقني ! إتقل تاخد حاجه نضيفه
