خاص لجريدة عشموذيع الإخبارية حوار مع "نسمة يحيى" مصممة أول براند ملابس لقصار القامة 

تشرفت جريدة عشموذيع الإخبارية بإجراء حوار مع عارضة الأزياء "نسمة يحيى"، مصممة أول براند ملابس لقصار القامة فى مصر والشرق الأوسط.

1/ عرفيني بنفسك مين هى "نسمة يحيى"؟

أنا نسمة يحيى، عندى 20 سنة، من المنصورة، فى كلية تربية قسم إعلام جامعة المنصورة. 

2/ إيه اسم البراند بتاعك؟

اسم البراند بتاعى "Breeze"

3/ليه اختارتى إسم "Breeze" للبراند بتاعك؟

اختارت الإسم ده لأن معناه بالعربى يعنى "نسمة"، عشان كده حبيت إن يكون إسم البراند على إسمى.

4/إزاى جاتلك فكرة براند الملابس لقصار القامة؟

جاتلى الفكرة لأن أنا كنت بواجه دايماً مشكلة اللبس من أولى إعدادى إنى مبلاقيش لبس مناسب عليا بسهولة، لما كنت بروح محلات الأطفال الديزاين "التصميم" مكنش بيكون مناسب مع السن بتاعى، ولما كنت بروح محلات الكبار كنت بحتاج إنى أرمى نص القماش والديزاين بتاعه بيبوظ، فدايماً كنت بقابل مشكلة صعبة جداً فى الموضوع ده، وده كان بيسببلى إحباط رهيب لأنى مش لاقية أى حاجة على مقاسى زى زمايلى، ففكرت إنى أحل المشكلة فبدأت ارسم أى تصميم أنا عايزاه وبروح للخياط يفصلهولى فى الأول مكنش أى حد بيوافق إن هو يفصل لكن بعد كده بدأت اصمم على الموضوع ده وبدأت اشتغل عليه اكتر من أولى إعدادى لتانية جامعة كنت دايماً بفصل كل اللبس بتاعى، فقولت طب ليه مشكلة اللبس دى محلهاش لينا كلنا كفئة قصار قامة لأن كلنا بنواجه نفس المشكلة ففكرت إنى اعمل براند لقصار القامة، البراند بنشتغل فيه بطريقة أون لاين على النت

5/ إمتى بدأتى فى تنفيذ فكرة البراند؟

بدأت انفذ الفكرة يوم 2020_9_25

6/ازاى بدأتى تطبقى الفكرة على أرض الواقع؟

طبقت الفكرة على أرض الواقع إن أنا نزلت عملت كذا تصميم ونزلت أنا اتصورت بيهم كموديل، وبدأت اعرضهم وقولت إنى عملت اول خطوة من نجاحى، بشتغل أون لاين الناس تبعتلي مقاساتها على النت وأنا بعملهم التصميم اللي هما عاوزينه وببعته عن طريق شركة شحن.

7/ إزاى قدرتى تسوقى للفكرة بتاعتك ولمشروعك ككل؟

بسوق للفكرة وللمشروع عن طريق السوشيال ميديا وعن طريقى أنا شخصياً اكتر 

8/ مين كانوا أول الداعمين ليكى فى الفكرة؟

الداعمين ليا فى الفكرة طبعاً أهلى هما اول دعم ليا وهما اللى شجعونى إن انا اعمل حاجة مختلفة وحاجة يكون ليها إسم بشكل كويس.

9/ إيه الصعوبات اللى واجهتك فى تنفيذ الفكرة؟

الصعوبات اللى واجهتني إنى كنت محتاجة تمويل ومحتاجة رأس مال لكن أنا قدرت استغنى عن كل ده، وبدأت الفكرة بحاجات بسيطة منى أنا شخصياً وبعض الناس كانت بتقولي إن المشروع ده مش هينجح عشان فئة قصار القامة فئة قليلة جداً فى المجتمع فبلاش اشتغل عليه كويس.

10/ إيه الهدف من فكرة تصميم براند ملابس لقصار القامة؟

الهدف من تصميم البراند هو إنى أدى ثقة بالنفس لقصار القامة اكتر وإن أنا أوصل فكرة وجود فئة قصار القامة فى المجتمع بشكل كبير والناس تكون عارفاهم أكتر وإنهم يلاقوا احتياجاتهم متوفرة إلى حداً ما بشكل جزئى شوية

11/ ايه الكلمة اللى تحبى توجهيها لقصار القامة بوجه خاص، ومصممين الازياء بوجه عام؟

الكلمة اللى أحب أوجهها لقصار القامة بشكل خاص «خليكم واثقين من نفسكم، حققوا متفضلوش تتمنوا طول الوقت حققوا نجاحات وخليكم عارفين إن جواكم قدرات تقدروا تكسروا بيها الدنيا، المهم إن كل واحد يبص على الجانب اللى جواه اللى يقدر يحقق منه نجاح، ومنستناش المجتمع يتغير المهم إن إحنا اللى نتغير بنفسنا ونبص دايماً لنفسنا بنظرة حب وبنظرة تأقلم، وإننا نحب ننسق هدومنا وننسق شكلنا لأن نظرتنا بتنعكس على نظرة اللى قدامنا».

الكلمة اللى أحب أوجهها لمصممين الأزياء بوجه عام «إن هما يتجهوا لفئة قصار القامة أكتر، ويعرفوا إن الفئة دى بتواجه صعوبة جداً جداً فى الازياء وإن المشكلة دى لازم تتحل لأن هما فئة موجودة فى المجتمع ولكن كل احتياجاتهم مش متوفرة فلازم إلى حداً ما نوفرلهم الجزء ده وخاصةً إنهم يصمموا أزياء تليق بشكل الجسم بتاعهم وإنها متبرزش حاجات معينة فى الجسم وتكون تصميمات مختلفة وفى نفس الوقت مريحة»

فى نهاية الحوار نحب نشكر مصممة وعارضة الأزياء "نسمة يحيى"، على الحوار الممتع ده وعلى فكرتها الجميلة اللي قدرت تقدمها بطريقة بسيطة ونتمني لها الأفضل دائماً.

إقرأ أيضًا/لقاء سفيرة مصر فى طقشند ببعض أعضاء الجالية المصرية

إقرأ أيضاً/الرئيس السيسى يتوجه إلى الأردن تلبية لدعوة الملك عبدالله الثانى

إقرأ أيضاً/متابعة تامة من قبل رئيس الوزراء لمبادرة إحلال السيارات المتقادمة للعمل بالغاز الطبيعى