أنا أصلي مبعرفش أعمل إسكييب "Skip"..
طول عمري مقتنعة إن أي حاجة حلوة لازم تأخد حقها وتقولها إنها حلوة بل وتشجعها، لما أشوف شخص عمل أي إنجاز أيًا كان نوعه ومهما كان حجمه.. لو حاجة ملموسة ولو كلمة، حركة لطيفة بس محدش إدالها حقها قلبي ميطاوعنيش أخطيها لازم أتكلم وأقول إنها حلوة وإلا ضميري يفضل يأنبني طول الوقت..
ورغم إني اتعرضت كتير أوي لمواقف محرجة بسبب الموضوع ده من نفس الناس اللي ببقى حابة أشجعهم أو أبارك واكتشفت إن مش الكل بيشوف كلامك الحلو وفرحتك بشكل كويس..
كل واحد مننا بيشوف الفعل من منظوره هو، ممكن تفرح لشخص لكنه شايفك غيران منه يمكن عشان هو في الأصل غيار.
_مش هتبطلي بقا لسانك اللي مسحوبة منه ده..!
°هو أنا غلطت في إيه لما بقول جميل ومبروك.
_قولتلك ميت مرة مش أي حد هيفهم طيبتك وتشجيعك وأديكي شوفتي ردة الفعل على اللي قولتيه كانت عاملة إزاي!
°مكنتش متخيلة إن في ناس بالتفكير ده.. أنا كنت بقولها مبروك..
_وإنتي تقوليلها ليه هي مش من بقية عيلتك إفهمي بقا.. أنا ماشية.
مشيت زميلتي وسابتني لوحدي بفكر في اللي حصل، وليه يحصل معايا المواقف السخيفة دي رغم إن بيكون قصدي خير، يا ترى لازم أبطل أتكلم وأشوف وأسكت بعد كدا عشان أبقى محبوبة!!
غصب عني طلعت آخر جملة برا تفكيري ونطقتها من غير أقصد.. لقيت شاب واقف قدامي معرفش كان موجود من بدري أو لا..
_لا إنتي كدا منتهى اللُطف .
°نعم؟!
_أنا آسف لو اتدخلت واتكلمت كدا من قبل ما أعرفك على نفسي بس بصراحة سؤالك استفزني، انتي محبوبة وطريقتك جميلة متغيريهاش..
°هو حضرتك تعرفني؟
"سِكت شوية وبعدين رد عليا"
_اه أنا ياسين بشتغل في الجريدة معاكي بس قسم الفن.. مشوفتينيش قبل كدا؟
°لا! أهلًا أنا مريم..
_عارفك يا مريم وإلا مكنتش جيت كلمتك بعشم كدا، مريم؛ أشطر حد يكتب مقالات سياسية في المجلة، ورغم شطارتك في السياسة إلا إنك محتاجة تتعلمي منها لسياستك في الحياة نفسها حياتك انتي.
°إنت بتقرأ اللي بكتبه!
_أكيد..
"شغلت ذكائي شوية واستنتجت من كلامي أنه حضر اللي حصل فسألته"
°هو حضرتك شوفت الموقف اللي حصل من شوية؟
_شوفت، وجيت دلوقتي مخصوص عشان أنبهك متزعليش لأنك طيبة جدًا وعارف إن أي حاجة ممكن تأثر على نفسيتك وتزعلي رغم إنك مغلطتيش..
"هو مين ده، أنا يمكن أكون ماشية بذاكرة سمكة وبنسى الناس اللي أعرفهم أصلًا لكن مش لدرجة إن شخص عارفني وبيشتغل معايا ومعداش قدامي ولا مرة أنا فعلًا بشوفوا لأول مرة.. منكرش إن طريقة كلامه لفتت انتباهي، بيتكلم بهدوء وثقة لكن مش عارفة أستوعب طريقته خالص"؟!
_بتفكري كتير ليه؟ متزعليش من تصرفها وتفتكري إنك غلطتي.. عارفة، انتي غلطتي عشان عبرتي عن فرحتك لشخصية زي ديّ يمكن متعرفش يعني إيه نقاء زي نقاءك يا مريم الزمن دلوقتي مبيمشيش غير بالخُبث والعنتظة.. بيتسابقوا في مين يرسم نفسه.. اللي زيك مش كتير، لا هما مبقوش موجودين أصلًا.. لازم تتأكدي إنك متميزة لكن لو هتصححي حاجة في طريقتك هيبقى إنك تختاري اللي يستاهلوها فهمتيني يا مريم؟
"هو قال ثلاثة مريم لحد دلوقتي، هو قال اسمه إيه؟ أنا ليه حاسة إني أعرفه بقالي كتير كدا، كلامه حسسني إني مش غلط زي ما زميلتي قالت وفرحت.. فرحت إن في حد شايفني كويسة كدا"
_مريم!! سمعاني؟
°ها!! أنا؟ مريم.. اه سامعاك..
_لسه شايفة إنك غلطتي؟
°لا كلامك أكدلي إني كنت صح لما اتعودت أقول حلو وجميل وما شاء الله.. موقفش الكلمة الحلوة..
_المهم تكون للي يستاهلها يا مريم..
} شكرًا ليك بجد..
مشى فعلا طلع الجريدة لكن لاحظت إن كذا حد بيبصلي من البنات اللي شغالين معانا وجت زميلتي تاني بسرعة وهي مستغربة..
_ياسين كان قاعد معاكي ليه؟
°هو انتي تعرفيه؟
_حد ميعرفش ياسين؟ ده رئيس التحرير..
°لا رئيس التحرير يبقى أستاذ حسام.. وبعدين ياسين ده قال إنه بيشتغل في قسم الفن!!
_هو ده كان مجاله زمان وبعدين انتي هتلغبطيني ليه أنا هنا من سنين وانتي يدوب لسه كام شهر.. المهم أوعي يكون ضايقك ولا اتضايق من الصوت والموقف بتاع جيهان؟
°لا.. مش عارفة..
"قومت عشان أكمل شغل وأنا مش فاهمة، كلامه.. ولا اللي مها قالته؟ ده عارفني وبيقرألي.. متابعني وليه؟ فضلت باقي اليوم متلخبطة لحد ما جيه آخر اليوم أخيرًا هروح أنام بعد صداع اليوم الرهيب ده.. تاااني مش معقول هو تاني..
_ها؟ لسه مضايقة؟
°هو حضرتك فعلًا رئيس التحرير ولا زي ما قولت في قسم الفن؟
_مش عارف ازاي يا مريم انتي مكملة بدماغك دي في السياسة رغم إن مقالاتك بتعجبني لكن سياستك في الحياة تحسيها قالبة على سياسة طفل عشر سنين .
' ضحك.. ضحكت رغم إنه يكاد يكون بيسخر من ذكائي لكن عنده حق'
°أنا كنت فاكرة إن أستاذ حسام هو اللي رئيس التحرير هنا.. أصل أنا مش بشتغل بقالي كتير ويعني في حاجات كتير في الجريدة معرفهاش معلش..
_قولتيلي بقا بيتكوا فين؟
_ليه؟!!!
_لا ولا حاجه هتناقش مع الحاج عامر والدك شوية في السياسة مش اسمه الحاج عامر برده.
اقرأ أيضًا/|شمس مصر|.. ليلة الإسراء والمعراج
اقرأ أيضًا/|شمس مصر|.. حكايات عِطر ويوسف
اقرأ أيضًا/|شمس مصر|.. المشاكل تكشف حقيقة المشاعر
