|شمس مصر|.. بدايته في ناشئي الأهلي، ولعب للعديد من الأندية في القسم الثاني وسط بني سويف.. يتحدث عن رحلته في ملاعب القسم الثاني في حوار خاص لجريدة شمس مصر
عندما نذكر اسمه فنحن نتحدث عن لاعب طاف ملاعب الكرة شرقًا وغربًا.. بدأ بناشئي الأهلي، ومنه للإسماعيلي، ثم القناة وفاركو وغيره من الأندية في القسم الثاني، مسيرة حافلة لواحد من اللاعبين المميزين في مركز خط الوسط، السن بالنسبة له مجرد رقم في البطاقة، فعلى الرغم من أنه ابن الثانية والثلاثين.. ولكنك لا تشعرّ بذلك أبدًا عندما تراه في أرضية الملعب كأنك ترى لاعب في العشرينات على الرغم من كبر سنه.. إلا أن حلم الدوري الممتاز لازال يراوده؛ لذلك تستضيف جريدة شمس مصر واحدًا من أهم لاعبي خط الوسط في الدوري الممتاز ب_ الكابتن محمد عبد الستار ناشئ الأهلي السابق، ولاعب بني سويف الحالي.
• في البداية حابب أرحب بيك يا كابتن محمد معانا في جريدة شمس مصر أهلًا وسهلًا بيك
° السلام عليكم أهلًا وسهلًا بحضرتك، أنا سعيد إني موجود معاك ومع الجريدة المحترمه دي.
• في البداية يا كابتن حابب أتعرف على حضرتك
° الاسم محمد عبد الستار من محافظة الشرقية وبلعب كا هاف دفندر
• كابتن محمد يمكن من الناس اللي لعبت في أكتر من فرقة في القسم الثاني، قولي إي أكتر تجربة فرقت معاك في مشوارك لحد الآن؟
° الحمد الله أنا لعبت في أكثر من نادي.. يمكن أنا طالع من ناشئين النادي الأهلي، وبعد كده انتقلت للإسماعيلي برضو في مرحلة الناشئين، ولعبت موسمين وتواجدت في الدرجة الأولى، بس طبعًا في الوقت ده.. كان موجود جيل جامد جدًا كان اللي بيتمرن بس معاهم كده يبقي بطل، بعد كده مشيت من الإسماعيلي روحت نادي الحمام المطروحي_ لعبت ٣ مواسم، بعد كده انتقلت إلى طنطا بمبلغ ١٠٠ ألف جنية_ لعبت فيهم موسمين مع كابتن رضا عبد العال، ودول الموسمين اللي كنا بنافس فيهم على الصعود للدوري الممتاز.. بس محصلش نصيب، بعد كده رجعت لبلدي الشرقية، وكنا بنافس على الصعود وصعدنا لدورة الترقي، بعد تجربة الشرقية روحت نادي فاركو لمدة ٣ سنين، ويعتبر دول من أحسن ٣ سنين في حياتي، بعد كده انتقلت لنادي القناة في مجموعة القاهرة_ ولعبت برضو ٣ مواسم، ورجعت بعد كده لعبت موسم في الأولمبي الموسم الماضي، والموسم ده موجودأهو من بني سويف وربنا يوفقنا ونصعد بإذن الله.
• أنت واحد من اللاعبين اللذين لعبوا في ٣ مجموعات في القسم الثاني، شايف أنهي مجموعة اصعب ؟
°بص يا كابتن محمد إحنا لو هنتكلم على الممتاز ب_ ف هو والله العظيم دوري قوي جدًا وفي لعيبة على أعلى مستوى يعني بأمانة أنا شايف أنهم مختلفين، يعني لو جينا لمجموعة القاهرة ف هي مجموعة شيك كده ملاعب كويسة ولعيبة كويسة، والإعلام كمان مُتسلط عليهم بحكم إنه قريب منهم بالنسبة لمجموعة بحري السنين اللي فاتت كانت قوية جدًا، تعالى نتكلم بقا عن مجموعة الصعيد.. ف حدِّث ولا حرج عن مجموعة الصعيد الميزة فيها إن مفهاش فرقة قوية وفرقة ضعيفة، مثال لو أنت متصدر الدوري ورايح لفرقة في آخر الدوري أنت مش متاكد إنك هتكسبها ولا لاء، ودي ميزة في مجموعة الصعيد إن الدوري فيها قوي جدًا وهوَّ الممتاز ب كله قوي أوي.
أقرأ أيضا مهاجم بني سويف في حوار خاص لجريدة شمس مصر يكشف كواليس الإنضمام للنادي وتجربته المميزة
• هل ممكن في يوم من الأيام نشوف محمد عبد الستار في الدوري الممتاز، وهل جالك عروض قبل كده ولا لاء؟
°الحمد الله بأمانة كعروض من الدوري الممتاز محصلش في الوقت الحالي، كان من زمان كده وانا لسة ٢٤ سنه_ جالي عرض من المقاولين العرب، بس برضو محصلش نصيب ساعتها كنت في نادي فاركو، أنا دلوقتي ٣٢ سنه بس الحمد لله السنة دي مش مقياس خالص.. احنا دلوقتي بنشوف لعيبة في الدوري الممتاز أكبر من كده، وأنا كمان في الملعب بفضل الله مش بيبان عليا السن ده خالص، وأكيد أنا بتمنى التوفيق ولو ليا نصيب إن شاء الله هلعب في الدوري الممتاز.
• تغير الأجهزة الفنية هي مشكلة كبيرة في الدوري المصري.. كله مش القسم الثاني بس شايف دا بيأثر على لاعب كرة القدم ولا لاء؟
°طبعًا تغير المُدربين ده بتكون حاجه صعبة جدًا على اللاعبين، إن ممكن تكون بتلعب مع المدرب ده وراكب مع المدرب بتاعك ماشي كويس.. ياجي مدرب تاني يروح مقعدة أنت ممكن تكون ماشي بمستوى كويس وفورمة كويسة.. ف المدرب الجديد يبعدك ويلعب حد تاني، ف دا بيأثر على اللاعيبة، وبيأثر على الفرق، أنا شايف إن مجالس الإدارات لازم يكون فرصة كبيرة للحكم على المدربين مش يلعب ماتش واتنين وتلاقي المدرب ماشي_ هياجي مدرب تاني هيشوف اللاعبين ولسه هيجرب، ممكن برضو يفشل ف دا بيأثر جامد.
• كلمني عن الجهاز الفني ودوره مع الفريق من أول اختيار اللاعيبة، وكمان كيفية التعامل مع اللاعبين
°طبعًا إحنا معانا جهاز فني مُحترم_ بقيادة الكابتن محمد يوسف، ومعاه الكابتن سيد، وكابتن عبدالله آمين، وكابتن سادات.. طبعًا كلهم لاعيبة كورة، دائمًا لما بيكون المدير الفني والمدربين اللي معاه لعيبة كورة بيكونوا قريبين أوي من اللاعبين، ومعاملتهم مع اللعيبة أخوات أكتر من مدربين، ويمكن سوء التوفيق بس بيعمل لغبطة شوية، إحنا الحمد لله مخسرناش غير ماتش المنيا وبإذن الله الفترة الجاية النتائج تكون كويسة.
• لو في فرقة بتضم عدد كبير من اللاعبين المميزين في نفس المركز هل شايف إن ده ممكن يعمل أزمة للمدير الفني؟
°بالعكس انت بتلعب دوري قوي جدًا ودوري طويل جدًا فلما يكون عندك أكثر من لاعب مميز يعني لما يكون عندك ٤ ديفندر مميزين وأحسن من بعض ف انت كامدير فني بتكون في حيرة بس دا دور الجهاز الفني، إنك بتكون مفهم اللاعب إن كل واحد له دوره.. لما فرصتك تجيلك أمسك فيها واركب في المكان، ووجود أكتر من لاعب مميز دا بيكون حاجه كويسة لإنك بتلعب دوري قوي جدًا، وكل اللعيبة هتلعب، وأهم حاجه إن اللي يلعب يثبت نفسه.
• من أهم الأدوار اللي بتعمل استقرار لأي فريق هي_ الإدراة، كلمني عن دور مجلس الإدارة في تحفيز الفريق
° أهم حاجه طبعًا للاعبي الكورة علشان يركز؛ لأن كل اللاعبين دول مسؤولين عن أسر اللي خاطب واللي متجوز، ف أهم حاجه المديات ف طبعًا احنا كل لعيبة كورة خصوصًا في الممتاز بس ممكن العقود متكونش عالية أوي خصوصًا في مجموعة الصعيد، ف أهم حاجة الالتزام من مجالس الإدارات، لو أنت كا إدارة التزمت مع الاعبين في الماديات دا أهم عنصر لنجاح أي فرقة علشان كده أي فرقة في أي مجموعة بتلتزم مع اللاعب بالماديات بتخلي اللاعيب خلاص مش مركز في حاجة غير في الملعب.
• وجود أكتر من فرقة مميزة في المجموعة هل ده بيعمل روح للمنافسة_ بمعنى انا دلوقتي في نادي بني سويف ومعايا في نفس المجموعة أسوان لسه نازل من الدوري الممتاز وكذلك المنيا وكيما أسوان.. شايف إن وجود الفرق دي بيعمل روح إن أنا لازم كل ماتش أخد التلاتة بونط؛ علشان أوصل للدوري الممتاز؟
°طبعا زي مقولت لحضرتك المنافسة قوية جدًا.. حوالي خمس فرق بينافسوا، وكمان حتى الفرق اللي مش بتنافس اللي في وسط الجدول، الفرق دي على ملعبها فرق صعبة جدًا، ممكن توقع أي فرقة.. طبعًا أسوان هو المتصدر، فرقة كيما محترمة جدًا، كمان المنيا فرقة على أعلى مستوى وكمان بني سويف فرقة قوية والمنافسة بينهم قوية جدًا، والفرقة اللي هتقدر مش هنقول كل الماتشات هقولك بنسبه كبيرة تكسب ماتشات على أرضها وتخطف برا تعادل أو فوز_ دي اللي ممكن تصعد.
أقرأ أيضاالفراعنه تفتتح مشوارهم في كأس العرب بهدف في شباك لبنان
• حِلم الصعود بيحلم بيه كل الفرق إي اللي لازم يكون متوفر في الفرقة علشان تصعد؟
° طبعًا أي فرقة بتحاول إنها تصعد بتكون من أول السيزون محددة أهداف ليها، وكاتباها قدامها المدير الفني نفسه بيختار مدير فني على أعلى مستوى وهو بيختار لعيبة كويسة، وأهم حاجه الالتزامات المادية.. ممكن ماتكونش العقود عالية، بس أهم حاجة تكون ملتزم مع اللعيبة ف دا أهم عُنصر في اللعبة_ الالتزام المادي علشان اللعيب مايكونش مركز في أي حاجه غير الملعب وبس .
• قبل بداية الموسم كان فيه مُقترح بتقسيم المجموعات بشكل مختلف_ بمعنى أندية الشركات كلها في مجموعة والأندية الشعبية في مجموعة.. إي رأيك في المقترح وهل شايف إنه ممكن يطبق وله لاء؟
° بصراحة شايفه صعب جدًا؛ لأن فريق زي أسوان ياجي يلاعب مثلًا المنصورة ف ده صعب جدُا، وتكاليف على الأندية الشعبية.. إلا بقا لو الاتحاد هو اللي هيكون مُتكفل بالمصاريف، ودا برضو صعب إن الاتحاد يتحمل كل مصاريف الأندية الشعبية. ف أنا شايفه مقترح مش هينفع مع الممتاز ب وشايف إن الأندية الشعبية هتتظلم لو النظام اطبق، ف ده قرار غير موفق.. أحسن حاجه النظام المعمول بيه حاليًا دا_ مثلًا في مجموعة الصعيد من بني سويف لحد أسوان ١٤ ساعه سفر.. تخيل بقا لو راحت أسوان المنصورة أو دمياط صعب جدًا.
• عاوز أخدك من الدوري الممتاز ب ونروح للدوري الممتاز، شايف الدوري ازاي بعد مرور ٦ جولات ؟
° طبعًا الدوري قوي جدًا بتتكلم في الأهلي والزمالك وبيراميدز، ومنافسة قوية بينهم، وكمان فرق الشركات الصاعدة حديثًا_ زي نادي فاركو اللي سبق ليا اللعب فيه ٣ مواسم.. فرفة محترمة ومعاهم رئيس نادي كويس وبيصرف، أهم حاجة عنده فرقة تكون كويسة، وانا أعتقد إن فاركو هتكمل في الممتاز وهتنافس السنوات القادمة على الدوري، وبرضو فيوشر معاهم مدير فني على أعلى مستوى، يمكن الشرقية للدخان؛ علشان التصرف الخطأ برضو ومجابوش لعيبة قوية بيعانوا، والدوري السنادي قوي جدًا.. من الفرق اللي عجباني جدًا غزل المحلة_ كابتن محمد عودة عامل فرقة محترمة، كل حاجة مختلفة السنادي، التصوير بدأ يكون في تحسن.. أتمنى نكون زي قطر كده وكلنا شايفين البطولة العربية خير دليل.
أقرأ أيضاميسي يكتب التاريخ ويفوز بالكرة الذهبية للمرة السابعة
• طبعًا ماينفعش تكون معانا ومسالكش عن منتخب مصر_ شايف المنتخب بالقائمة الموجودة ممكن يعمل حاجه في كأس العرب، وهل مصر قادرة على الوصول لكأس العالم، وكمان أمم إفريقيا على الأبواب شايف هنقدر نوصل لحد فين في البطولة؟
° منتخب مصر بيضم لعيبة على أعلى مستوى في أنديتها، أتمنى من المُدرب يقدر يختار أحسن تشكيل في كل البطولات أنا شايف إن في بطولة العرب حاسس إن في تأثير عليه من الجهاز في بعض اللاعبين إن شاء الله في البطولات القادمة التصفيات وكمان أمم إفريقيا يكون النجوم بتوعنا موجودين كابتن محمد صلاح والنني، وكمان إن شاء الله تريزيجه، ونقدر ننافس بقوة ونصعد كاس عالم وكمان نعمل حاجة في البطولة الأفريقية، وكذلك أتمنالهم التوفيق في البطولة العربية.
• في النهاية حابب أشكر حضرتك يا كابتن محمد شرفتنا ونورتنا وكنت سعيد بوجودك معايا
°أنا اللي حابب أشكر حضرتك يا كابتن محمد وأنا سعيد إني موجود معاك، وأشوفك كده يارب احسن صحفي في مصر.
