انا شخص كلى ذنوب
ومفيش حاجات تتحب
بقا كل من هب ودب
بيتمصمص على حالى
وبيهربوا من سؤالى
انا ذنوبى مكنتش بإيدى
نفسى فى شخص يكونلى طبيبى
يمدلى إيد العون
عمره فى يوم مايلوم
القدر والأيام
وكله هيبقى تمام
بس صعب الاقى حد اصيل
حد يسند ويشيل
عمره فى يوم مايميل
انا ذنبى مهوش كبير
بس محتاج حد متين
حد أحتاجه الاقيه
حد يطبطب ويحابى
ءأمنه على سر حياتى
يساعدنى فى التوبة
وصداقته متكنش معيوبة
نفسى فى صُحبة صالحة
مش صُحبة بعاميلها الجاحدة
تدلنى ع الجنة
وانا والله بتمنى نتلاقى
انا لسه مبقتش م الديابة
انا فى اول الطريق
بس لو ليا صديق يرجعنى
شخص يردعنى
هكون من الصالحين
وهكسبه ثواب عظيم
بس فين الاقيه
وانا همسك فيه
شايفك ياللى بتقول
انا كمان نفسى
كنت عايز اتغير من تلقاء نفسى
انا اصلى مش معصوم
فليه جايبين عليا اللوم
ليه مينصحوش
ليه بيتلونوا ويداروا الوشوش
كله ليه خطايا
كله عنده خبايا
انت بتعلق ذنبك على شماعة الصحبة
ونسيت نفسك الجاحدة
نسيت تصلح حالك
نسيت يوم سؤالك
هتعمل الطيب هتلاقيه قريب
هتعمل المعاصى هتبقى عاصى
واخرتها هتقول ياريت
وانت هتكون فى البيت
بيت القرار
كفاياك تقول اعذار
اغلط واتعلم
اذنب وتوب
اوعى تخلى عندك عيوب
فى القلب والدين
ابقى لنفسك صديق
ابقالها قاضى
بدل مانت فاضى
تحكم على الناس
وساعتها الذنوب هتنقاس
وتتمسح سطر سطر
وتتبدل حسنات
وتقول اهو ذنب وفات
واتعلمت من السنوات
انا كنت أواب
فرضيت نفسى ودينى
وربى كان حامينى
وطهرنى من الذنوب
فكنت عبد وتاب
فنعم هو أواب
اقرأ أيضاً/ أسعار العملات الأجنبية والعربية اليوم بالبنوك المصرية
اقرا أيضا/ أسعار الذهب اليوم بمحلات الصاغة وفقأ لآخر التعديلات
اقرأ أيضاً/ أسعار الفواكه والخضروات اليوم بالأسواق المصرية