في شخصيات اجتماعية كتير
بنقابلها في حياتنا ودول بيتعرفوا على ناس كتير في حياتهم من خلال مدرسة، منطقة، نادي، جامعة
الناس دي بيبقى عندها حب للتعارف والصحوبية وانا واحد من الناس دول واللي دايمًا بيقولوا إن معرفة الناس كنوز.
من فترة كده بدأت ألاحظ إن في ناس معروفين وحواليهم ناس كتير أوي ودايمًا بيقولوا إنهم لوحدهم وإن كل اللمة الكبيرة دي كدابة وكلهم فيك.
وفي ناس تانية بتقول إن اللمة الكبيرة الكدابة دي اللي كلها ضحك وهزار وفرفشة بعد ما بيروحوا محدش بيسأل عن التاني وكل واحد بيقول كلام في ظهر التاني طب إزاي؟!
وده إن دل ميدلش غير إنك تبص حواليك اللمة الكدابة اللي حواليك وقت الجد، الحزن، الوجع، مش هتلاقي منهم حد جنبك غير عدد يتعد على صوابع الأيد الواحدة فعلًا نظرية محتاجة دراسة إزاي تعرف صاحبك أو اللي بيحبك بجد لازم تبقى في زنقة أو خنقة أو جرح عشان تعرف تفرق.
اللي هو لو عايز مني حاجة أنا عمري مهتأخر بس متدخلش في صحوبية لو مش صفيلي وحاببلي الخير هخليك جنبي ليه فأحب أقول إن مش أي حد ينفع يكون صاحب
======
اقرأ أيضًا
====
وفي صحاب يعرفو بعض من أيام الجامعة أكل، شرب، خروج، سفر، هزار، ضحك كانو مع بعض كل يوم تقريبًا ميسيبوش بعض بس لما واحد وقع ملقاش مكالمة تليفون حتى حد يسأله أنت عامل إيه أو أخبارك أو أنت فين دي بقى الحاجات اللي بتوجع الواحد إن أقرب الناس ليك ميبقوش جنبك وقت ما تحتاج حد جنبك ده مثل بسيط أوي لللمة الكدابة وفي حياتنا كتير أوي من الناس دي .
======
اقرأ أيضًا
====
بس منكرش إن ناس تانية كانت موجودة في حياتي و معارف من زمان و ناس عرفتهم في شغل اه علاقتنا مكناش قريبين من بعض زي الناس اللي فاتت بس هم بردو صحاب يوم لما عرفوا إني وقعت متأخروش إنهم يبقوا جنبي وفي ضهري و سند معايا مرة واتنين وتلاتة وفعلًا مكنوش مستنين مني حاجة وبيسألوا مرة واتنين بيتكلموا لما نتقابل أول سؤال أنت أخبارك إيه دلوقتي يمكن اللي هم عملوه ده كنت مستنيه من ناس تانية.
بس اللي أحب أقوله عزيزي القارئ خليك دائمًا صاحب وسند لأصحابك وجدع زي ما بيقولوا عشان لما تقع تلاقي الصاحب الجدع وعلى رأي المثل قدم السبت عشان تلاقي الحد ومتتأخرش عن مساعدة حد لو تقدر مش عشان مستني حد يقف جنبك لا عشان ربنا هيعوضك بحد يشيلك أو يقف جنبك وقت ما الدنيا تقفل معاك أو تقع.
======
اقرأ أيضًا
====
أحب أشكر المواقف اللي فركشت اللمة الكدابة وبعدت عني ناس كتير بدون أي مجهود مني
مهما عرفت ناس وقابلت ناس وعاشرت ناس وكلت معاهم وسافرتوا وخرجتوا ونمتوا و و و ، هترسى على واحد أو اتنين لو حظك حلو وكل اللمة الكدابة هتفضل تقل موقف فموقف وكل ماعرفت ده بدري كل ما كان أحسن وأهون.
مش أي حد يتقال عليه صاحب غير لما يثبت ده بالمواقف.
اقرأ ايضا اطمن
اقرأ ايضا متي تستحق العلاقة الإصلاح؟
اقرأ ايضا عدم تقدير النفس
